Técnico en Servizos de Restauración e Técnico en Cociña e gastronomía: Formando profesionais orientados á excelencia

Sendo Galicia un destino tradicionalmente turístico, non é de estrañar que a demanda de profesionais en hostalería e restauración evolucionase nos últimos anos de forma paralela e ao mesmo ritmo que as esixencias do mercado. Cada vez máis, profesionais con formación específica relacionada coa hostalería e a restauración son demandados, aos que se lles esixe responsabilidade, polivalencia e unha clara orientación ao cliente.

O CPR Belarmino Fernández Iglesias é unha das institucións destacadas dentro da formación neste campo, que dentro da súa oferta inclúe o ciclo medio de Servizos en Restauración, un título que permite aos estudantes adquirir competencias relacionadas tanto coa preparación e servizo de alimentos e bebidas, así como coa atención á clientela, sempre respetando as normas establecidas.

A evolución no sector fai patente a necesidade de profesionais que teñan capacidade de abranguer un gran número de tarefas, cunha actitude de autoformación e mellora constante, que ademais se desenvolvan nunha contorna cada vez máis competitiva. Por iso, a institución foi avanzando cos tempos, innovando nos seus procesos de formación, consolidándose así como un sinónimo de calidade dentro do sector hostaleiro.

Ademais da formación teórica, o alumnado que opta por estudar na nosa escola consigue unha preparación práctica para o mundo laboral, sempre orientada cara a excelencia. Para iso, durante o curso fanse numerosas actividades que permiten a interacción de alumnos/as dos diferentes ciclos, o que da aos estudantes unha perspectiva aproximada da realidade das necesidades e esixencias da profesión.

Na busca constante de sinerxias con diferentes empresas galegas por parte da Fundación e a escola, lévanse a cabo numerosas colaboracións con compañías do sector da alimentación e bebidas. Estas accións, habitualmente, compóñense dunha fase máis teórica, nas que os alumnos e alumnas coñecen ao detalle as propiedades dos produtos e como empregalos, e unha parte práctica na que a elaboración e pratos ou a presentación ao cliente permítelles adquirir unha maior bagaxe que os distinguirá no futuro dentro do mercado laboral.

Ademáis o Centro ten en marcha dous proxectos Erasmus+ (Belarmino Move to Europe e EVT Fundación Belarmino Fernández Iglesias Hostelería Ribeira Sacra) mediante os cales o alumnado e o profesorado do Centro poden realizar prácticas en diferentes países europeos tales como Finlancia, Irlanda e Italia, desta forma os alumnos/as poden analizar o sector e a súa evolución en diferentes zonas do mundo, así como adaptar os coñecementos adquiridos á realidade hostaleira no noso país.