Luis Caramés participa no I Ciclo de Conferencias Aída Fernández Ríos

O presidente da Fundación Belarmino Fernández Iglesias e académico numerario da Real Academia Galega de Ciencia (RAGC), Luís Caramés Viétez, será o relator de “Incerteza e ciclo económico”, charla enmarcada no I ciclo de Conferencias Científicas Aida Fernández Ríos para o 26 de novembro ás sete da tarde.

Unha webinar na que o catedrático de Economía Aplicada da Universidade de Santiago de Compostela expoñerá a situación actual ante un público heteroxéneo xa que a inscrición esta aberta a todas as persoas interesadas. Un encontro incluído nun bloque de conferencias que correrán a cargo de persoas de recoñecido prestixio en distintos ámbitos e que falasen de Sanidade; o cambio de hora; Intelixencia Artificial, as aplicacións das cadeas en bloques e pesca, acuicultura e biotecnoloxía.

Estas propostas completásense cun segundo bloque de actividades dirixidas a estudantes de ESO, de centros de ensino da provincia de Pontevedra, para os que están previstas as conferencias: Os peixes tamén van ao médico, Exoplanetas, o reto da procura da vida máis aló do sistema solar; CSI Made in Galicia; A que altura esta o ceo? e Detectives de imaxes.

Un conxunto de actividades organizadas pola RAGC e a Deputación de Pontevedra co obxectivo de promover o interese do público xeral, e promocionar o labor científico desenvolvido en Galicia. A RAGC leva organizando actividades, cursos e ciclos de conferencias en toda a comunidade galega desde a súa fundación no ano 1973, e en liña cos seus obxectivos (difundir a ciencia e a tecnoloxía) pretende instaurar este ciclo de conferencias no que se abordan distintas temáticas con repercusión na sociedade.

Para formalizar as inscricións e máis información pode consultar aquí.