Lucus in Vino Veritas 2021 contará coa participación do alumnado do CPR Belarmino Fernández Iglesias

Lucus in Vino Veritas é un evento do sector vinícola, con representación de adegas con especial importancia dentro do territorio galego e con vinculación ás vías romanas. Está dirixido por Isabel Lozano Verdes, alumna do Ciclo Superior de Vitivinicultura do CPR Belarmino Fernández Iglesias e a edición de 2021 terña lugar o vindeiro 5 de xuño nun dos espazos máis emblemáticos de Lugo: o atrio da catedral.

Os asistentes poderán gozar tanto de 25 adegas seleccionadas de toda a península, así como dunha variada programación de actividades durante os días previos ao evento.

Mércores 2 de xuño, 19:00 horas: Mesa redonda “Pasado, presente e futuro da Ribeira Sacra”
A Escola Politécnica Superior de Enxeñería (Campus de Lugo, Universidade de Santiago de Compostela) acollerá esta actividade onde Cristina Mantilla, docente do centro, exporá o seu punto de vista sobre a Ribeira Sacra e o seu futuro. Estará acompañada por Roberto Regal, Julián García Berrios e José Manuel Rodríguez, nun coloquio moderado por Isabel Lozano no que esperan poder avistar un futuro socioeconómico esperanzador para esta denominación de orixe.

Venres 4 de xuño, 12:30 horas: Aperitivo maridaxe
O alumnado do ciclo formativo de grao medio de servizos de restauración será o encargado de servir o viño nesta actividade que se celebrará en CEI NODUS. A recoñecida sommelier Susana Barros realizará unha maridaxe única xunto a cinco chefs da Asociación Cociñeiros Lugo que crearon cinco tapas especiais para este evento.

Venres 4 de xuño, 21:30 horas: Cata de viño con Susana Barros
Terá lugar no atrio da catedral de Lugo. A entrada é de 10 euros/persoa e as prazas son limitadas ata completar aforo.

Sábado 5 de xuño: evento principal
O atrio da catedral de Lugo acollerá unha serie de actividades ao longo do día:
11:00 horas: Apertura de portas
11:30 horas: Cata de aguardentes e licores. Impartida por Sonia Otero Padín (vogal do consello regulador da I.X. de las Aguardentes e Licores Tradicionais de Galicia)
13:00 horas: Showcooking con Cociñeiros Lugo
18:00 horas: Concurso de cata por equipos con Juanjo Treus
20:00 horas: Showcooking con Cociñeiros Lugo
21:00 horas: Concierto musical: “Supreme Jazz Dúo”
22:00 horas: Peche de portas

O acceso realizarase con entrada anticipada. Podes ver máis información na web do evento.